लघुकथा--- बाध्यता !!

मेहनती, ईमान्दार र मितव्ययी , यी तीन उस्का पर्यायवाची शब्द । कामको लागि दिनरात भन्दैन थियो । समय समयमा घर पैसा पठाइरहन्थ्यो, भन्थ्यो, " म बाहेक कोही छैन घरमा कमाउने, पैसा पठाएन भने चुल्हो पनि बल्दैन । "

धेरै भएको थियो मैले उस्लाई नभेटेको । परदेश न पर्यो, आफ्नो समय नै 'कम्पनी' सँग धितो राख्नुपर्ने बाध्यता । एक दिन फुर्सत मिलाएर फोन गरे उस्लाई । मधुरो आवाजमा उस्ले मलाई बेलिबिस्तार लगायो र भेट्न बोलायो । म पनि चुपचाप उस्लाई भेट्न गए ।

भेट्नु अगावै बाहिरबाट नै आवाज सुने उसैको, शायद फोनमा कुरा गर्दै थियो, 'म सञ्चै छु आमा, मेरो केही चिन्ता नमान्नुहोला । म बेला बेलामा पैसा पठाइरहन्छु है ।...................... '

यसो भन्दै गर्दा ऊ अस्पतालको शैय्यामा जिन्दगीका अन्तिम दिनहरु जिउँदै थियो !!!!