खत्तम भयो

भट्टी पसियो खल्ती रित्तियो, खत्तम भयो ।
किन्नुपर्ने सूचीमा रासन थियो, खत्तम भयो  ।

नपाउन्जेल त केवल गुनासो थियो नपाएको,
पाएपछि गुमाउने डर थपियो, खत्तम भयो ।

आँधीसँग लड्ने हिम्मत जुटाए'थ्यो दियोले,
ठ्याक्कै यै बेलामा तेल सकियो, खत्तम भयो ।

लेख्न त धेरै लेख्यो होला, भाग्यमा भावीले,
शायद लेख्दा लेख्दै मसी पोखियो, खत्तम भयो ।

म होशमा आउनु अगावै प्रियाले छाडेर गइन् ,
मातेको बेला खै के के बोलियो, खत्तम भयो ।

भरिन नमानेको हो

भरिन नमानेको हो जब थैलीले प्वाल पायो ।
बिचरा त्यो दैवले बित्थामै अवगाल पायो ।

धेरै पछि चम्किलो देखियो उसको अनुहार,
शायद वर्षौं पहिले हराएको रुमाल पायो ।

उसले बडो मेहनतले हजूरको भकारी भर्यो,
बिडम्बना उपहारमा आफैले अनिकाल पायो ।

शहरमा हुर्किएको मान्छे गाउँलाई यसरी हेर्छ,
लाग्छ कि विज्ञानको विध्यार्थीले कंकाल पायो ।

भाग्यमानी भन्नु हुन्छ कि अभागी भन्नुहुन्छ ?
यौटा भोकाएको बालकले चाँदीको थाल पायो ।